រដ្ឋធានីប៊ូចារ៉ែស្ដ (Bucharest)៖ កងទ័ពអាកាសរ៉ូម៉ានី និង អ៊ីតាលី បានបញ្ចេញយន្ដហោះចម្បាំងជាច្រើនគ្រឿង ដេញស្ទាក់យន្ដហោះចម្បាំងរបស់រុស្ស៊ី ហោះនៅជិតដែនអាកាសរបស់ខ្លួន ក្រោយការវាយប្រហារទៅលើទឹកដីរបស់អ៊ុយក្រែន។

សារព័ត៌មាន The Daily Digest បានចេញផ្សាយ កាលពីព្រឹក ថ្ងៃសុក្រ ទី២ ខែឧសភា ឆ្នាំ២០២៥ ថា រ៉ូម៉ានី បានចេញយន្ដហោះជាច្រើនគ្រឿង ឆ្លើយតបទៅនឹងមីស៊ីល និង ដ្រូនរបស់រុស្ស៊ី វាយប្រហារទៅលើប្រទេសអ៊ុយក្រែន ជាមួយនឹងសេចក្ដីរាយការណ៍ ពីការជំរុញឲ្យព្រំដេនរបស់រដ្ឋជាសមាជិករបស់អង្គការណាតូមួយនេះ ស្ថិតក្នុងស្ថានភាពប្រកបដោយគ្រោះថ្នាក់។

បើតាមទស្សនាវដ្ដីរបស់សហរដ្ឋអាមេរិក Newsweek បានបកប្រែសេចក្តីថ្លែងការណ៍របស់ក្រសួងការពារជាតិរ៉ូម៉ានី យកមកចុះផ្សាយ ថា ក្រសួងការពារជាតិរ៉ូម៉ានី បានបញ្ជាក់ នៅក្នុងសេចក្ដីថ្លែការណ៍មួយ ថា ការវាយប្រហារ ត្រូវបានគេកំណត់គោលដៅលើជនស៊ីវិល និង ហេដ្ឋារចនាសម្ព័ន្ធកំពង់ផែ នៅជិតខាងព្រំដែនរបស់ប្រទេសជិតខាង។ រ៉ាដារបស់ប្រទេសរ៉ូម៉ានី បានបង្ហាញ ពីគន្លងយន្តហោះគ្មានមនុស្សបើក ឬដ្រូន នៅក្នុងចំណោមដ្រូនជាច្រើនគ្រឿង ដែលចូលរួមក្នុងការវាយប្រហារ អាចនឹងឆ្លងកាត់ នៅក្នុងរយៈពេលដ៏ខ្លី នៅលើដែនអាកាសរបស់ខ្លួន។

ស្ថិតក្នុងស្ថានការណ៍ នៃការគំរាមកំហែង មកលើដែនអាកាសរបស់អង្គការណាតូ នោះ កងទ័ពអាកាសរ៉ូម៉ានី បានបញ្ចេញយន្ដហោះចម្បាំង ប្រភេទ F-16 ចំនួន២គ្រឿង ចេញពីមូលដ្ឋានកងទ័ពអាកាសទូលស៊ា (Tulcea) ចេញប្រតិបត្ដិការ។ ស្របគ្នានោះដែរ អ៊ីតាលី ក៏បានបញ្ជូនយន្ដហោះ ប្រភេទ Eurofighter Typhoon ចំនួន២គ្រឿង ចេញពីមូលដ្ឋានកងទ័ពអាកាសមីហៃកូហ្កាល់នីសានូ (Mihail Kogălniceanu) ចេញស្ទាក់ដ្រូនរបស់រុស្ស៊ី ផងដែរ។

អង្គការណាតូ បានណែនាំដល់បេសកកម្មថែរក្សាការពារច្បាប់ និងសណ្ដាប់ធ្នាប់តាមផ្លូវអាកាស ក្រោយពេលរុស្ស៊ី បានរឹបអូសឧបទ្វីបគ្រីមៀ ពីអ៊ុយក្រែន កាលពីអំឡុងឆ្នាំ២០១៤។ គំនិតផ្ដួចផ្ដើមនេះ ត្រូវបានរៀបចំឡើង ដើម្បីតាមដានដល់រដ្ឋាភិបាលក្រុងមូស្គូ ពីការវាយប្រហារទៅលើរដ្ឋជាសម្ពន្ធមិត្តយោធារបស់អង្គការណាតូ។

បើគិតចាប់តាំងពីខែមីនា ឆ្នាំ២០២៥ រហូតមកដល់ពេលនេះ យន្ដហោះចម្បាំងរបស់អ៊ីតាលី ប្រភេទ Eurofighter ចំនួន៤គ្រឿង និង បុគ្គលិកកងទ័ពអាកាស ចំនួន១៨០នាក់ ត្រូវបានដក់ពង្រាយទៅកាន់មូលដ្ឋានកងទ័ពអាកាស Mihail Kogălniceanu ព្រោះវាជាផ្នែកមួយ នៃសកម្មភាពរបស់អង្គការណាតូ សម្រាប់បេសកកម្មថែរក្សា និង ការពារសណ្ដប់ធ្នាប់តាមផ្លវអាកាសឲ្យកាន់តែល្អប្រសើរឡើងរបស់សម្ពន្ធយោធាលោកខាងលិចមួយនេះ៕